:::…الإكتئآآآآآآآآآآآآآآآآآآب…:::

احم احم…ثم احم

اكتئآآآآآآآآآآآآآآآآآآآب…من الاسم…تحس ان الشخص يقول آآآآآآآآآآآه
يعني هم…شقى…زعل…ضيقه…ملل…كره…مرض…زهق…

ومن ناحيه فلسفيه…جسديه…تعني…ضيق في التنفس…توقف العقل عن التفكير…الوسوسه…كثرة الامراض…قلة النوم…الانطوائيه…العصبيه…التفهي والسرحان…تمني الموت…غرق بدون ماء…

طيب ندخل في الموضوع…

قبل شهر…

صوت باب ينفتح…ها يمه بشر وش صار في التحليل؟…يمه خالد اكلمك…فيك شي؟؟؟…قالك الدكتور شي؟؟؟…مادري مادري…انزين قول تكلم خرعتني…شاف الدكتور التحاليل…وقال لي عندك تليف في الكبد…يعني وشو تليف؟؟…مادري عنه…يقول احتمال تموت الكبد…لاحول ولا قوة الا بالله…ويقول هي للحين مادخلت في مرحلة الخطر…لكن لازم احافظ على الاكل وانتظم في حياتي…واسوي ريجيم واخفف من الدهون والعيش والوجبات الدسمه…الحمدلله خرعتني يايمه…دام انها جات على الرجيم…مافي مشكله نسوي لك ريجيم واكل يصلح لك…

يمه خالد يالله تعال الصاله بنتغدى…مسوين لك غدى صحي لك…ليه وانتوا وش غداكم…مكبوس لحم…وانا وشو غداي؟؟…ربع دجاجه مشويه وسلطه وتوست واحد…نفس ماهو مكتوب في الكتيب اللي عطاك اياه الدكتور…

شيخوه…وش تاكلين؟؟…تعالي اشوف…كافي سنيكرس…اللي انت تحبه…بس انت الحين ماتقدر تاكل…ممنوع عنك…

ها خلود…بنروح انتعشى في فيلاجيو…تخاوينا؟؟؟…لا ماظن…افا ليييه؟؟…الدكتور مانعني من اني اكل اكلات دسمه…

مع الايام…

خالد حياك اليوم مجلسنا مسوين عشى الملكه حق اخوي…بالمبارك ان شاء الله…لكن اسمح لي ماقدر احضر…الدكتور مانعني…

ها خلود اليوم رايحين مطعم توه فاتحينه هندي…شكله مب صااااحي…قم غير جو معانا…لا لا ماقدر…الدكتور مانعني…

ها خالد ترا الشباب متجمعين في بيت الشعر…مر علينا بعد العشى…نسمع سوالفك وعلومك…من زمان ما جيتنا…ان شاء الله ان شاء الله…اي بس مر…مب نفس كل مره ان شاء الله وماتجي…الله كريم…

طق طق طق…خالد يمه…تعال الصاله تقهوى معاي وسولف شوي…قاعده لحالي…مالي خاطر اطلع…

بعد شهر…

اليوم قسنا ضغطك…مرتفع…شي غريب…لان من شهر كان طبيعي…
مادري يا دكتور…احس ان جسمي ينمل…خاصه لما يجي وقت النوم…اخاف فيني مرض
واصابع يدي تبرد…اخاف فيني مرض
احس بدوار كثير…اخاف فيني مرض
وصرت ماحب اقعد مع الناس…اتضايق…
واحيان كثيره…اخاف اروح انام…اخاف اني اموت…من الامراض اللي فيني…

اولا…
لازم تعرف ان محد جاب هالامراض والتفكير السلبي…الا انت نفسك…
وسبب ارتفاع الضغط هو التفكير الكثير…والمحاتاه…اللي مالها اي داعي…
واصابع يدك تبرد…من الاعصاب…وهي ناتج عن التفكير اللي انت تمر فيه…فا دورة الدم عندك تتغير…
وعن التنميل فا هو كذلك…
القصد…انت مافيك الا العافيه…وتفكيرك الزايد…والمحاتاه…هي جابت لك كل هالوساوس…
وابعدتك عن الناس…

صحيح ان عندك مشكله في الكبد…لكن الاعمار بيد الله سبحانه…وانت مش في مرحلة الخطر…تقدر تعالج بالرجيم…
لكن الرجيم وتغيير نمط الحياه…ومنعك من اشيا انت كنت تحبها…اكلات معينه…سبب لك قهر…وهالقهر جا معاه مرض…يعني منع بالقوه…
فا جاتك حالة الاكتئآب…
ولازم تؤمن ب اللي الله كاتبه لك…”قل لن يصيبنا الا ماكتبه الله لنا”…

ولو نرجع للي صار لك…من بداية الرجيم…فا نشوف اشيا كثيره*انت سببها…
انت خليت كل ما في الدنيا من جمال ووناسه…وركزت على الاكل…وخليته سبب في عزلتك عن الناس…
ترا بدائل الاكل كثيره…مثلا تحب البيبسي…اشرب دايت…
تحب سكر مع الشاي…اشرب ب سكر قليل السعرات الحراريه…
المكبوس…كل…يقللون من الدهن…ويشوون اللحم…ويكون صحي…
ولما تبغي تروح مطاعم…روح وغير جو مع ربعك…ولجا وقت الاكل…ترا اكثر المطاعم فيها منيو للريجيم…واذا مافي السلطات ترتيب…او شوف لك اكل صحي…

وفي العزايم…وجب الناس…واقعد معاهم…ولجا وقت العشى…كل سلطه ومشي امورك…

واذا شفت نفسك ضايق…سولف…تكلم…فضفض اللي في قلبك…لشخص عزيز عليك…ولا تكتم اللي في قلبك…لان هذا بيزيد الهم عليك…ويمرضك زود…

واذا جات على المرض…لازم تؤمن بالقدر…واعرف ان هذا اجر لك…ومحبة من الله لك انه يغسل ذنوبك بها…فا لازم تفرح بهالشي…
وان بغيت…شوف غيرك…من اللي الله ابتلاهم…
اذكر قصه قريتها…كتاب “استمتع بحياتك” للشيخ عبدالرحمن العريفي…
رجل كان يشتكي من بلاء صاده…وانه ما يستحمل…ومتضايق…وفي نفس الوقت جاه شخص وقال له بنروح نعزي فلان…قال ليه عسى ماشر…رد عليه…زوجته وبناته وعياله ال 8 توفوا في حادث…وماقال الا لاحول ولاقوة الا بالله…والحمدلله على كل حال…انا لله وانا اليه لراجعون…
هنا الشخص شاف مصيبته الهينه بمصيبة فلان…وعتب على نفسه…وقال الحمدلله الذي عافاني من ما ابتلى به غيري…

اي بس انا اصلي واخاف ربي…وما اعصيه…وقارئ للقرآن…

قال سبحانه…”ولنبلونكم بشيء من الخوف والجوع ونقص ‏من الأموال والأنفس والثمرات وبشر الصابرين…”

انتهت القصه…

طبعا هذا مثال لناس يوصلون لحالة الاكتئآب…
وفي اسباب اخرى…
منها الوظيفه…الحبيب…الصديق…الفقر…الحاله الاجتماعيه”طلاق…ترمل…موت عزيز”…
…وكذلك المعاصي قال سبحانه”ومن اعرض عن ذكري فإن له معيشة ضنكا”…الابتعاد عن الله…

لكن انا اخترت المرض…والتغيير في نمط الحياة…
اشوفهم اكثر الحالات تصير عندنا…وافضل من ناحية شرح وتوضيح…وتوصيل للفكره…

هالموضوع للي فيهم اكتئآب…
وحتى للي حولهم ناس يمرون بحالة الاكتئآب…يحاولون يقعدون معاهم…يسولفون…يخلونهم يفضفضون مافي قلوبهم…ويذكرونهم ب الله…
ويهدونهم كتاب استمتع بحياتك…احم

الموضوع ان شاء الله يكون شامل الحاله وحلولها…
طبعا الموضوع اجتهاد شخصي مني…فا ان اصبت فضل من الله وحده…وان اخطأت فا من نفسي ومن الشيطان…

فا كل اللي باوصله…

“عيش حياتك…بسهولتها…ترا احنا من يعقدها…”

ولاهنتوا…

3 Responses

  1. سعود بن عبدالرحمن المضاحكه

    السلام عليكم ورحمة الله وبركاته
    يعطيك العافية يابوحسن على توضيح حالة الاكتئاب وهذي الحالة موجوده
    في كثير من شعوب العالم .. اصلن لو تم تفكيرهم سلبي ..
    بتجيهم الامراض الي يتوهمونها

    ويعطيك العافية بوحسن

    Reply
  2. SAUD
    SAUD December 20, 2011 at 10:45 |

    عن نفسي انا احس اني بمرض من كل المحاتاة يعني آكل صبع كتكات و اقعد لين الليل اوسوس بيرتفع عندي السكر مب كأني احس بدورة مب كأن يدي اليسره منمله شوي ….

    من المواقف اللي انت ذكرتها عزيمة بيت الشعر , انا ما اقدر الزم ربعي الا تشوون لي قطعة ستيك ولا ما بجيكم

    انا اعتقد و لا تضحك من اللي بقوله و الوسواس و المحاتاة ان لم تكن جينية وراثية فأعتقد انها من التربية

    و لذلك من منبري هذا أطالب الحكومة بفرض حصار اقتصادي على وزارة التربية ولا تقولون لي التربية من البيت , الطالب في البيت لازم يلعب بليستيشن و يتربرب و جبات ماكدونالدز و كنتاكي

    حاضركم يعلم الغايب

    و السلام عليكم ورحمة الله وبركاته

    Reply
  3. Saud Almudahka
    Saud Almudahka January 15, 2012 at 17:52 |

    موضوع جدا جميل وهذا الواقع
    الاكتئااب مدمر ناس كثيرر

    اشكرك على الموضوع الاكثر من رائع ..

    Reply

Leave a Reply