:…ناس تنولد ومعاشها 30 الف…وناس تتيتم ولهم 75 ريال…:

72857_10151539439997048_13502191_n

ام…ل ثلاث بنات…ربة بيت…امية…مات زوجها وبناتها اكبر وحده فيهم ١٤ سنة واصغر وحده ٩ سنوات…

الاب المتوفى كان من الدخل المحدود…ومعاش التقاعد ٣٥٠٠ ريال…

الام كانت اتحاول تدخر ف المعاش…واتحاول انها اتخلي شي يحمي ظهرها…لكن مب كل شي يجي ع الكيف…خاصه ان كان الصرف اكثر من الدخل…

يوم من الايام…جات بنتها الكبيره…واسألت سؤال…”يما ليه احنا ما انسافر؟” الام استغربت من السؤال…وماردت ع بنتها…قالت البنت” ربعي ف المدرسه كلهم يسافرون مرتين ف السنه صيف وربيع…يروحون اوروبا وامريكا وماليزيا…واحنا حتى دبي ماشفناها”
قالت الام “مد اريولك ع قد الحافك…”
قالت البنت” احنا قطريين…واللي معاي ف المدرسة قطريين…كيف هم عندهم فلوس ويسافرون واحنا لا؟”
قالت الام” شنسوي…الحمدلله ع كل حال…ولا اتطالعين اللي فوقك تتعبين…شوفي في ناس ماعندهم اكل ياكلونه في افريقيا …وانتي بس تبغين اتسافرين عشان تستانسين”
قالت البنت” اللي في افريقيا الله يعينهم…وهم فقراء…لكن احنا الحمدلله ابلادنا غنيه وفيها خير…ووين المشكله انعيش حياتنا مثل باقي الناس اللي حولنا…مب حرام ولا شي”
قالت الام” بس بس اسكتي…انا بروحي متسلفه من فلانه وفلانه…عشان بس كم مره طلعنا انتعشى…والحين تبغين اتسافرين…”
قالت البنت” يعني ابلادنا خيرها حق البعض؟…واحنا مالنا حق ؟”
ماقدرت اترد الام ع سؤال بنتها…وقامت من مكانها…
بعدها ب كم يوم…جاهم طارق عند الباب…
احنا من الشؤون الاجتماعيه…وودنا انساعدكم…لانك ارمله وعندك بنات…
كم شخص عايش ف البيت…عندكم حلال؟؟…غنم بقر…؟
كم معاش التقاعد؟…عندكم دخل ثاني لكم ولا بس معاش التقاعد؟
كم اعمار بناتك؟…انتي تشتغلين ولا لا؟…

جاوبت الام ع كل الاسأله ب عفويه…وتفاءلت خير…لها ولبناتها…وتمنت اتكون فرج لهم…وتقدر اتعيش بناتها وتسعدهم…

والام كانت تسمع ان في ناس كانوا يستلمون من الشؤون من ال ٦ وفوق…

بعدها ب كم شهر…تمت الموافقه ع معاش الشؤون…وكانت الصدمه…
الام لها ١٢٥٠ ريال شهريا
البنات لكل وحده ٧٥ ريال…شهريا

ماتكلمت الام ولا استفسرت عن سبب هالمبلغ الضئيل…وذلك ل عزة نفسها وكرامتها…وماودها اتكون من اللي يطروون…واللي يجي من الله حياه الله…

ومرت الايام…والام لاحظت شي غريب…ان كل شهر او شهرين…تجيهم وحده اتطق الباب…الضحى…البنات ف المدرسة…والام نايمه…وتدخل ه الوحده البيت اتشيك ع البيت من بره وتسأل الخدامه من ساكن ف هالبيت وهل عندهم غنم او حلال…وهل في رجال ساكن معاهم…

ولما اسألت الام قالوا لها الناس هذي من الشؤون تجي اتشيك عليكم…واذا صادت عليكم شي اتبلغ ويقطعون معاش الشؤون…قالت الام كله ١٢٥٠ ريال…وش بيقطون منه؟؟
الناس استغربت…وقالت لها اكيد في شي غلط…مايصير…
هذا فلان وعلان…محد سألهم ولا شي…اللهم كلموا لهم واحد شغال هناك…وضبطهم…ويستلمون ١٠ الاف ريال شهريا…لا وعندهم عيالهم يشتغلون وساكنين معاهم ف البيت…ولهم معاش تقاعد…

في احد الايام…
جاتها بنتها الصغيره…تسأل…
قالت البنت” يما ابغي معاشي”
ما افهمت الام…قالت “اي معاش؟”
قالت البنت”اللي يعطونك اياه لي”
قالت الام”اها قصدك ال ٧٥ ريال؟”
انصدمت البنت وقالت” بل ليه شوي…معانا وحده ف الصف معاشها ٣٠ الف ريال”
استغربت الام وقالت اكيد ان بنتها غلطانه…او ما افهمت عدل…وقالت لها” اشلون معاشها ٣٠ الف ريال…قولي لي”
قالت البنت “اي لانها من العائلة الفلانيه”
هنا الام افهمت…وقالت حق بنتها…”هذي امور احنا مالنا شغل فيها…وافلوسهم وكيفهم”
قالت البنت” يعني هي معاشها ٣٠ الف وانا معاشي ٧٥ ريال؟ …انا عمري ١٠ وهي عمرها ١٠…انا في المدرسه وهي ف المدرسه…انا قطريه وهي قطريه…حتى طولنا نفس الشي…وانعيش في نفس المنطقه…وبس لان ماعندي واسطه ولا اسمي مربوط ف العائلة الفلانيه انظلم ؟ “

انتهت القصة…

تستغرب من دولة…دخلها يعتبر من اقوى الموارد…مقارنة ب عدد سكانها القليل جدا…ماتقدر اتوفر معاش للشؤون يكفي الفرد…ويكون فعلا اسم ع مسمى…”مساعدة اجتماعيه”

ترا في ناس واجد خاصه ايام اول ماكانت معاشاتهم كبيره…يعني مثلا شيبانا الله يرحمهم…كانوا يشتغلون ميكانيكيين في كراج…او اللي يحفرون ابار النفط…او اللي سواقيين يوصلون العمال…ايام القحط وسنة ١٩٧٠
وهذول معاشاتهم ماتعدي ال ٣٠٠٠ ريال…ف لما يتقاعد كم معاشه؟؟…ولا شي حده نفس ماهو…
وهو يعول عائلته…ويصرف عليهم…

ف كيف السؤون يطبقون شروطهم ع هالفئه من الناس اللي ع قد حالهم…

اما الضباط والعساكر والمهندسيين حاليا…معاشاتهم توصل ١٠٠ الف وفوق…واذا تقاعد اقل شي بيكون ٥٠ الف… ف اذا سمح الله وتوفى…معاش التقاعد يكفي اهله وزود…
لكن ب العكس…تلقى اللي معاشاتهم زايده هم اللي يستفيدون من مساعدة الشؤون…ويعطونهم زود…اما اصحاب الدخل المحدود…تلقاهم يحكونه حك…ويبهدلونه…واخرتها ٢٢٥٠ ريال…

دام ان احنا ك دولة قدرنا انوصل معاشات هالناس ٥٠ الف وزود…ماقدرنا انزيد هالمساكين كم الف؟؟

واستغرب من اللي يقول…عندها اعيالها…خل هم يصرفون عليهم…
اسأل الكل…هل في حد منا ماعليه اقصاد؟؟…او مسؤوليات ماليه؟…
طبعا لا..اغلب الناس بالكاد معاشهم يكفيهم…ف كيف اخليه يصرف ع بيت ثاني…هو عنده حياته واعياله…ومصاريفه…
بيقدر شهر شهرين…لكن صعب يكون هو العون دائما…خاصه في قطر الحياه غاليه والجشع من التجار في ازدياد…لارقيب ولا حسيب…

ولو جينا للمنطق…
انشوف مصاريف لكل بيت كم…
البيت الواحد خدامه معشاها ٩٠٠ ريال
سايق معاشه ١٢٠٠ ريال
الجمعيه كل اسبوع ٦٠٠ ريال تقريبا يعني ف الشهر ٢٤٠٠ ريال
هذا غير المصاريف الجانبيه مثلا لمدارس او الجامعه…
يعني تقريبا ٤٥٠٠ ريال شهريا…
لو فرضنا معاش التقاعد ٦٠٠٠ ريال
كم يبقى له؟؟؟ ١٥٠٠ ريال؟؟؟

قطري يعيش ع ارض قطر…ارض الكرم والخير…يصفى له ١٥٠٠ ريال شهريا؟؟
بالذمة وش يقدر يسوي فيها؟
الحين الواحد اذا راح مطعم ومعاه ٤ اشخاص بيكلفه ٦٠٠ ريال تقريبا
واذا مطعم راقي ١٢٠٠ ريال…

هذا منطق؟؟
ويجيك راعي مساعدة الشؤون ويذل الواحد ذل…واخرتها يقول له هذي اكرامية منا ٢٢٥٠ ريال…
وعقب كم يوم يقول له قطعنا عنك ١٠٠٠ ريال…طيب ليه؟
والله لان زادوا معاش التقاعد حقك وصار ٧٠٠٠ ريال…ف مانقدر انمشي لك ٢٢٥٠ كامله…
واذا حاول الشايب يكلمهم ويقنعهم ان هالمعاش مايكفي…قالوا له القانون قانون…ومانقدر انتعداه…
وغيره وهو قاعد ف بيته…متسند ع الكرسي…يتصل ع فلان…ويضبط له معاش الشؤون ١٢ الف ريال…

اتمنى من المسؤولين يشوفون حال هالفئه من الناس اللي متبهدلين…وحالتهم حاله…
عطوهم زيدووهم…خلوا اعيالهم وخلوهم هم يعيشون حياتهم…دامهم ع هالارض الطيبه…والخير موجود…وش اللي يمنع…الحلال موجود…والخير موجود…خلوهم يسافرون…يستانسوون…يشترون…يعيشون…مب هذا هو ف الدستور…”الحياة الكريمة لكل قطري على هذه الارض”

مانقول اقطعوا عن الناس بل زيدووهم..احنا ابلاد خير… …لكن ودنا ف العدل…والمساواة…
ناس تنولد ويمشي لها معاش ٣٠ الف…وناس تتيتم واتمشون لهم ٧٥ ريال…

اخوكم علي…

الموضوع اخذ منك ٥ دقايق…

Leave a Reply