:::…النوخذة علي…:::

لازلت اتذكر
لما كان عمري ١١ سنة
علي يبا قم البس…ليش…تبغي اتروح معاي؟…وين يبا…بنروح بالطراد انحدق انصيد سمك…حزة ظهر…تونا متغدين صيف وحر…توني جاي من المدرسه…
يلا قم البس…بابرز الاغراض…باشربك بيبسي ماذقته من قبل…بس يبا عندنا بيبسي وشربت كم مره…صح بس اللي باعطيك اياه غير هذا بيبسي البحر وسط الشمس يندي بااااااررد…يلا قم
طموح…وتحفيز…لشرب البيبسي
ماتذكر اني كنت متشوق لطلعة الحداق…او البحر او حتى صيد السمك…
انا بيتوتي راعي تقنيه…بمعنى كنت اشتري سيارات ام جهاز وافككه بمعنى اكسرها واشدخها عشان عقب اطلع الدينما اللي داخلها واخذ المغناطيس…الخلاصه مب صاحي…
نرجع للموضوع
انا والوالد حطينا الاغراض ف البدي…بيكم ١٩٩٣ الابيض بوخطوط جميله حمره…
ثلاجتين وصندوق الميادير حق الحداق قعد الوالد يسوق وانا جنبه…
وصلنا فرضة الخور بهرني المكان مش من نظافته طبعا
لكن عالم وناس وكانت حزة القايلة حر وكتمه ورطوبه…
 حطينا الاغراض ف الطراد…وقلصناه بالتيدر…ونزلناه ف البحر…
كنت مندهش من هالعالم…طراريد انواع واشكال…لنجات وبوم ب احجام هائلة لدرجه ارفع راسي عشان اشوف قمتها…شي رهيب بالنسبه لي…
وصلنا منطقة التفتيش…
هلا بوعبدالرحمن…ماشاء الله اشوف معاك ولدك…وش اسمك…علي…ماسمعك…قول بصوت عالي…علي…صوت مكينه الطراد عالي قول بصوت عالي…عاااااااللللللييييي…حيالله علي…ها بوعبدالرحمن فشت سميسمه؟…اي يابوسلمان…وش اسم الطراد…رالي…
انا هنا استوقفني الاسم…رالي…جميل جدا…
اول ماحركنا…اتمر جنبنا وحولنا لنجات كبيره وطراريد…والوالد يدرول…بكل ثقه…وانا اطالعه ب انبهار وتعجب وفخر…وقفته وهو يسوق الطراد بالنسبه لي ولعمري كشخه كلها ثبوت تركيز مسؤوليه…جدا جدا بهرني الموقف واسعدني…كلي فخر ب ابوي…كان شعور لايوصف…
عقب مشوار ساعه تقريبا…وصلنا فشت سميسمه…
سالت الوالد يبا شلون عرفت ان وصلنا…قال لي شفته البويه السوده اللي هناك…وشفت الشيب اللي هناك لما اتكون ف النص بينهم يعني انت وصلت…
عجبني الوضع…لاني كنت امفهي وفاچ حلجي حق الهوا من قوته…ومادري عن اي شي…ف زادني انبهار كيف عرف الموقع وكله ماي وبحر بدون اجهزة ملاحة…مافي اي علامه…وكنا انمر ع بويات كثيره…لكن هو بعلمه ومعرفته وخبرته يقدر يميز بين هذي وذيك…
قطينا خيوطنا…كل واحد ف جهه…انطالع الافق…لاشي حولنا…غير بحر…وبحر
خيطي صاد وكان حلالي’زوجين من الشعري’
قالي لي الوالد اللي يصيد اول واحد وحلالي يسمونه باشا…
شوي نقد خيطي وكان ثقيييل مب نفس الاول…سحبت وسحبت…طلعت هامووور ضخم…قال لي الوالد اللي يصيده يسمونه نوخذه…
طبعا انا فاچ الحلج ومتشقق واعطيه نظرات اللي عشان اتعرف بس…لان ابوي ماصاد شي وانا قاعد اتفنن عليه واول مره لي ف البحر…
سالته
يبا وشو يعني نوخذه…
قال النوخذه هو القائد اللي يكون مسؤول عن الناس اللي معاه ع سفينته وجدك كان نوخذه…هو اللي علمني عالبحر…كانوا يسافرون شهووور…وكل ما وصل خذاني معاه وعلمني عالبحر والصيد وسواقة السفينه…قبل مافي دراسه ولا تعليم…كل شي بالتجربه والخبره…جدك علمه جدي…وانا الحين اعلمك وانت بتعلم اعيالك…
انت يا علي من صلب نواخذه لهم تاريخهم ف الخليج…انفعوا الناس واخدموهم…اسال عنهم ف قطر والبحرين والكويت والسعوديه…
هالكلام رسخ ف بالي سنين طويله…قطر والخليج يفتخرون بهم ولي الفخر انا منهم…
وعقب ٢٢ سنه…منها دراسة ١١ سنه غربة وتعب وسفر وشقى وجهد كبير…احقق حلمي…والحق ب اجدادي وابوي…وارفع راسهم مثل ماهم ارفعوا راسي…وارفع راس بلادي قطر وافتخر وكلي فخر اني قطري…هي مني وانا منها…
وبتاريخ 15/12/2015
حصلت ع شهادة قبطان بحري…’نوخذه’ من الجامعه البحريه ف استراليا… تخصص النقل البحري وإدارة الموانئ…
الحمدلله وحده…بفضل من الله سبحانه تحقق حلمي…ثم دعوات امي…ومساندة زوجتي وخواتي واخواني…وصديق الدرب فيصل العبدالله اشكرك من كل قلبي يابوسلطان…وكل من ساندني وشجعني اشكركم جميعا…
وكلمتي ل ابوي…ياريتك يا يبا كنت موجود اليوم…ابوس راسك وابشرك صرت نوخذه مثلك ومثل جدي…واشوفك فخور بي…وابتسامتك اللي عمري ماراح انساها…
ابغي اقول لك انا من صلب نواخذه…وصرت نوخذه وضنك ماخاب فيني لما قلت بتوصل ب اذن الله…عشان اشوفك تفتخر فيني…قدر الله وماشاء فعل…١٠ سنوات من وفاتك بتاريخ
29/12/2005
…الله يرحمك ويغفر لك يارب…ولا حول ولا قوة الا بالله…
واوعدك يا يبا…مثل ما كان جدي يخدم بلاده والناس ب علمه وخبرته ف البحر…انا بخدم بلادي قطر…بكل ماعندي من علم وخبره وجهد…
هذي بلادي قطر ماقصرت علينا من عطاء ومسانده لاوصل لهذا المرتبه…ف ماراح اتوانى او اتاخر في تطويرها ومساعدة المسؤولين بالنهضه لدولة قطر…واستخدام شهادتي لصالح بلادي…
نواخذة المضاحكه…
جري بن عبدالله
علي بن سلمان بن سيف ال شاهين
سلمان بن شاهين ال شاهين
احمد بن سعد ال سعد
سعود بن جري
شاهين بن جمعه ال شاهين
حمد بن صالح كحيلان
علي بن جمعه ال شاهين
محمد بن علي ال بو غانم
علي بن راشد ال راشد
راشد بن حمد ال راشد
عبدالعزيز بن جمعه ال شاهين
محمد بن شاهين بن فهد ال شاهين
محمد بن مبارك ال سعد
عبدالرحمن بن علي ال راشد
سلمان بن علي ال راشد
ابراهيم بن حمد ال راشد
غانم بن علي ال بو غانم
عبدالرحمن بن سلمان ال شاهين
سعد بن سلطان ال شاهين
يوسف بن مبارك ال مبارك
محمد بن عبدالله ال محمد
شاهين بن احمد ال شاهين
فهد بن جمعه ال مهنا
عبدالعزيز بن مبارك ال سعد
جباره بن محمد ال بو غانم
واتشرف اكون منهم…
علي بن محمد بن عبدالرحمن بن علي ال راشد

One Response

  1. احمد شتات
    احمد شتات February 19, 2016 at 16:13 |

    كتابة مميزة ورائعة

    Reply

Leave a Reply