:::…برامج الايفون…يازينها…لكنها…حراااااام…:::

 

 

 

 

عالم التلفونات…والبرامج…من فينا مايحب البرامج…خاصة في التلفون…وتحلـي برامج التلفون في اوقات الانتظار…مثلا عالق في الزحمة…والسيارة تمشي خطوتين واتوقف…فا هنا مافي شي احلي من التلفون لكسر الملل…واستغلال الوقت…

طبعا يا برنامج مفيد ولا لعبة …ولا اي حاجة…

الايفون…لايختلف اثنان علـى انه عمل نقلة كبيرة في عالم التلفونات…
خاصة برامجه…مافي شي يجي علـي بالك…الا ولقيت له برنامج…في الايفون…

في برامج لها قيمتها…وتدفع لها فلوس لشرائها…وبرامج تم وضعها من قبل مطوريها ب بلاش…كلن وعلـي حسب رغبته…

لكن…دخل علينا برنامج اسمه سيديا…وهو انك تعمل كراك للايفون…اي انك تكسر الحماية في الايفون…وبذلك تقدر اتحكم في الايفون كما تريد من ناحية انزال البرامج او تغيير السيستم او او او…

وتم اصدار برنامج اسمه انستالوس…وهذا برنامج ترفع فيه برامج تم كسر الحماية لها…وبذلك تقدر اتنزلها في الايفون المكرك…

الخلاصة…انك تقدر اتنزل برامج ب بلااااااش…للايفون المكرك…من خلال برنامج انستالوس…والبرامج المكركة لا يمكن انزالها الا عندما تكسر حماية الايفون…

مممممم…برامج ب بلاش…كا فكرة…اكيد جميلة…ويسال لها اللعاب…ومغرية…
فا مثلا برنامج سعره ب 100 دولار…اي 365 ريال قطري…تقدر اتنزله ب بلاش…بدون لا تدفع ريال واحد…
من لا يشده هذا العرض…وهذا الامر؟؟؟…

لكن…خلونا انشوف الفكرة من جانب اخر…

وانلخصها لكم في مثال بسيييط…

محل من المحلات…يبيع سلعة من السلع…
جا علي وشرا السلعة ب 500 ريال…
وبعد اسبوع…علي شاف صاحبه سالم…وكانت عنده نفس السلعه…
ودار هالحوار بينهم…
علي: اوه اوه…يا الله على القلد…يعني شفتني شريت هالسلعة قمت قلدتني وشريتها…
سالم: خف علينا اقول…لاشفت السلعة عندك ولا ادري بها…امس شفتها في محل وشريتها…
علي: اها…بكم شريت السلعة…
سالم: ب 200 ريال…
علي بقق اعيونه وقال: نعم ياخووووويه؟؟؟…عسى ماشر…اتقص على من؟؟؟…
سالم: يتلفت يمين ويسار ويقول: اشفيه هذا؟؟؟…كبرك عشان استعبط عليك؟؟…اي شاريها ب 200 ريال امس…واذا تبغي باوريك الفاتورة…ليه انت بكم شريتها؟؟؟
علي والحزن يخيم عليه قال: ب 500 ريال…لا ونفس المحل…
سالم ماسك ضحكته متشمتا…وقال: عشان اتعرف بس…وعطاه نظرة على جنب…

انتهى المثال…

علي متحسر وزعلان…انه خسر 300 ريال…وغيره ربحها…وشي يقهر…انه هو يدفع هالمبلغ وغيره يستفيد منه بسعر ارخيص…

هذا صار ب رغبة من المطور نفسه والشركة نفسها اللي عملت الخصم…فما بالك لو ماكانت لها يد في هذا الامر…

وهذا ينطبق عليه موضوع البرامج المكركة…
فا ناس تبذل جهد وتعب وتدفع افلوس للتطوير وصنع البرامج…واتبيعها عشان تقدر تستفيد وتربح من وراها…وانت تاخذها باردة امبردة…فا اين قول الرسول عليه الصلاة والسلام”اعط الاجير اجره قبل ان يجف عرقه”
اليس استخدامك للبرنامج يعتبر انك استخدمك عمل شخص ما…ويجب عليك اعطاءه اجره وخاصه انه وضع مبلغ لهذا البرنامج…

وناس تدفع افلوس للبرامج وتشتريها ب المبلغ المحدد لها…وتتبع القوانين…
وناس اتنزل البرامج ب بلاش…
اليس هذا يعتبر ظلم…ويعتبر غش؟؟؟
قال الرسول عليه الصلاة والسلام”من غشنا فليس منا”
فا عندما انت تشتري سلعة بمبلغ وغيرك يستخدمها ب بلاش وبدون موافقه صاحب البرنامج…اليس هذا يعتبر غش…
حط نفسك مكانه…ماهو شعورك؟؟؟

وعلى فكرة…
ترا الافلام والبرامج والمسلسلات اللي اتنزلها من النت واللي طرحت ب مبالغ مالية لمشاهدتها…وانت قاعد اتنزلها ب بلاش…تعتبر نفس الحالة…
وايضا بكلامي ليس فقط ل برامج الايفون…
فا كلامي ايضا ينطبق على باقي برامج التلفونات…
والبرامج للكمبيوترات…وغيره من الامور المكركة اللي ناس تدفع لاجلها افلوس…وانت تستخدمها بلاش…
تراك محاسب يوم القيامة عليها…
فا هل تسوى عليك الكم ريال اللي تدفعهم…انك تؤثم عليها؟؟؟

وعشان الخلاصة اذا كنت انت صح ب فعلك ام خطا…

عليك ب اتباع قول الرسول عليه الصلاة والسلام:
“استفت قلبك، البر ما اطمأنت إليه النفس واطمأن اليه القلب، والإثم ما حاك في النفس وتردد في الصدر، وإن أفتاك الناس وأفتوك”

فا حكم عقلك واستفته…
في ان غيرك يدفع افلوس ل يستخدم السلع والبرامج …وانت تستخدمها ب بلاش…

والله وراء القصد…
وهالموضوع حبيت اني افيدكم فيه…خاصه ان حنا غافلين عنه…ويمكن مافكرنا فيه…فا هذه فرصة للتفكير…وتحكيم العقل…لتصرفاتنا…ومعاملاتنا…

وللعلم…
مافي حد فاتحته في هالموضوع…وان ما اقتنع لكلامي…
اشوفه عقب فترة…تأثر…وقام ينزل برامج ب فلوس…وكنسل الكراك…
فا من فينا لايخاف الله سبحانه…ووخاصة انه ب الامكان تفادي الاثم…والظلم…والامر جدا سهل والاسعار ارخيصة…

ولكم القرار…

اخوكم علي…

One Response

  1. Lord
    Lord January 14, 2012 at 20:15 |

    والله يا بوحسن كلامك فيه شي من الصحه
    بس
    وركز لي على بس

    يا خي برامج الايفون بالذات معظمها بدون فترة تجربه

    يعني اذا أعجبك برنامج وحبيت تشتريه
    لازم تغامر وتتوكل على الله وتدفع علشان تجربه بشكل كامل

    وانا واحد من اللي يشجع على البرامج الاصليه
    بس المشكله
    البرامج وايد وانت تبي تجرب كل شي علشان تتاكد من البرنامج
    اذا صج ينفع والا لا

    تصدق اني شريت كم برنامج وحذفتهم
    للاسف
    لأني اكتشفت انهم ما ينفعون او ما يؤدون الغرض اللي شريتهم علشانه

    عموما
    شاكر لك هذا الإلقاء الرائع

    وعلى فكره
    في بعض الناس عندهم لبس في موضوع التحريم والتحليل
    بالنسبة للجيلبريك
    لان في واحد من المشايخ متابع موضوع الجليبريك
    وقام بتحليله
    اعتمادا على ان الجليبريك
    هو عمليه
    ” تسمح بتنزيل برامج غير رسميه او غير موجوده اصلاً في
    Apple store

    يعني حلل هذا الجانب فقط ولم يتطرق لموضوع
    البرامج المكركه

    وشكرا

    Reply

Leave a Reply